Sasampunné milih lan milah déwasa ayu raris Prabu Kurupratipa lunga nangun tapa ring tengahing wana. Saking negari Hastina ida lunga ngruruh Gunung Himawan mirig Luah Gangga kantos rauh ka Hardwar genah suci. Genah puniki kasengguh suci sakadi arannyané sané Har maartos Siwa, Hari maartos Wisnu, lan Dwar maartos lawan—gapura galang ka sorga. Saking driki ida lunga ka Shri Kardanath lan Shri Badrinath genah suci Betara Siwa lan Wisnu nampek pucak Gunung Himawan. Sadurungé, driki ida Sang Prabu malukat lan mamuja tapa ring Alahaabad, genah suci pecampuan Tukad Gangga, Yamuna, lan Saraswati. Ring tengahing wana tepi pacampuhan luah puniki Ida mamuja suryasewana.
Ri kalaning Ida Sang Prabu asujud hening nguncarang mantram raris hening mona brata. Drika raris rauh Déwi Gangga mahyun angusik tapan Sang prabu. Maayun langkah panyemitan ayuning semara, metuang ambu angaras-aras lan maklentingan alon nuju linggih Ida Sang Prabu. Sakancan tingkah binal kalampahang mangda sang prabu matangi saking tapandané. Sakadi sekar maambu miik sayar-soyor maélogan, nanging tamulilingané leplep tan pakrisikan. Asué-sué sahanan tingkah binal sampun kalampahang, nanging Ida Sang Prabu Kurupratipa kantun ajeg nangun tapandané. Drika raris Déwi Gangga maangkregan mapikyun nangun winaya sapunapi antuk mangda prasida ugi Sang Prabu matangi saking tapa heningnyané lan mapikayun ngoték sang apsari binal.
Menawi sampun kaanggit winaya raris Déwi Gangga makenyem manis lan mangkrak girang macincingan nganggit wastra raris malinggih manying songgéng ring kiwa pupu sang nata.
Binal mangosék-osék anggan Sang Prabu sané raris matangi munggel tapan dané lan kagiat pisan manggihin Déwi Gangga sané malinggih songgéng ring kiwa pupun dané. Wiakti banget ngenyudang manah tingkah Déwi Gangga, nanging krana songgéng ring pupu kiwa linggih Déwi Gangga sané sakadi nguakang wastrannyané lan mibirang pupu putih. Krana tiling lan wicaksana Ida Sang Prabu raris nunggal ring angen ida—Déwi Gangga tan patut dados striku krana ring kiwa malinggih manying songgéng.
Tan asué Déwi Gangga kabopong ka Hastina lan kapajatukarmang sareng putran ida sané mapeséngan Prabu Santanu sané kabénjang pungkur dados lelampahan lantang Mahabratané.
Kaketus saking :
* http://www.balipost.co.id/BaliPostcetak/2008/4/13/ort7.html
0 komentar:
Posting Komentar
Semeton sane jagi komentar, ngicenin kritik, saran, request, utawi sekadar kenalan driki manten ring kotak komentar niki. Sampunang lali dagingin wastan sameton ne ring kotak Beri komentar sebagai. Suksma!!