Om Awignam Astu namo sidham, Om sidhirastu tad astu astu ya namah swaha

Jumat, November 12, 2010

Dewi Gangga Makenyem

Olih : Nyoman Manda

Ring Puri Hastina iur sampun tutur pakrimik saisin puriné krana sané dibi ida permaisuri malih ngembasang putra. Dayang-dayang sané sampun ping pitu ngiring Déwi Gangga masiram ka tepi tukad ageng malih saling neneng lan kitak-kitak ten purun makemikan krana pastika Déwi Gangga malih pacang matingkah soléh pacang mapi-mapi katiban kasengkalan okané anyud ring tukadé.

Prabu Sentanu bengong malinggih ring bataran lojiné nguntul kucru miragi tangis okané sané wau embas dibi sanja. Ping pitu sampun okané telas kaanyudang olih Déwi Gangga. Tan pisan kapiragi rabin idané nyelsel krana okané sampun anyud. Nguntul ida makeengan

“Sing pesan ida madué rasa sayang ring oka, monto sakadi sinongganané yan ngembasang putra satmaka magantung bok akatih, ngemasin ngetohang jiwa, dadi jeg lén pesan ida, kanti sampun ping pitu nganyudang oka di tukadé, ping kuda simbingin, putran raja di Hastina dahat mautama pisan apang ada nglanturang kauripan gumi Hastinané,” kantos ngebug anggan idané baan sungsut lan kosek kayunné krana tingkah rabin idané ping pitu sampun sakadi nyelapang nganyudang okané ka tukadé. Yan pradé mangkin rabin idané malih matingkah asapunika pacang tambakang ida yadiastun ida kantun kaiket antuk semayané riin ten pisan dados nimbaang sahanan solah polah rabin idané yadiastun jelek pisan.

Ri sedek ida maangen-angen sakadi asapunika raris medal rabin idané saking jeroan nyangkil putran ida sané kantun barak raris ngeplakang tangan pacang nitahang panyeroané ngiring ida masiram ka tukadé. Drika raris Sang Prabu Sentanu ngadeg lan maujar sada keras akidik.

“Adi agung....”

“Napi Bli Agung?” taler sakadi nantang Déwi Gangga masaur krana élah lan éling ring semayané riin.

“Adi bakal lunga kija?” ngancan nyangetang nengkik ida mawacana ngenah sampun ida sakadi brangti ring kayun

“Titiang bakal masiram ka tukadé sareng putran titiang taler putran Bli Agung sakadi riin,” Déwi Gangga nampekin rabin idané sané duka punika.

“Ten dados!” nengkik Prabu Sentanu mawacana.

“Napi Bli Agung?” galak taler Déwi Gangga masaur.

“Ten dados masiram ka tukadé ageng!”

“Bli nimbaang titiang?”

“Nggih,” bawak sang prabu masaur lan ngenah pisan ida duka.

“Cutetné adi agung ten dados masiram ka tukadé saréng putran bli sareng sané kantun barak puniki lan adi agung apang uning saking nguni bli agung tuah nyantosang putra sané pacang nglanturang kaajegan gumi Hastinané,” daas-diis ida ngandika krana dukané, nanging jeg nadak sara Déwi Gangga makenyem manis lan blamban matur lan alon nampekin sang prabu.

“Suksma pisan bli agung sampun duka nimbaang sikian titiang masiram ka tukadé krana bli agung sampun suéca mupusang pastun Sang Hyang Betara ring Kahyangan mawinan mangkin titiang prasida mawali malih ka kahyangan. Suksma pisan bli agung lan niki mula putran i raga sané pacang ngentosang kedatuan Hastinané,” Sang Prabu Sentanu bingung lan raris kaambil tangan idané olih rabiné.

“Puniki katatwané bli agung....”


Kaambil saking :
* http://bali.forumotion.net/orti-bali-f27/dewi-gangga-makenyem-t346.htm

Artikel Terkait Ring Kategori



0 komentar:

Posting Komentar

Semeton sane jagi komentar, ngicenin kritik, saran, request, utawi sekadar kenalan driki manten ring kotak komentar niki. Sampunang lali dagingin wastan sameton ne ring kotak Beri komentar sebagai. Suksma!!