Pupuh Dangdang Gula

Nyambung ring postingan tiang ring artikel Geguritan Utawi Tembang Pupuh, ne mangkin tiang jagi ngicenin akidik makudang-kudang conto Pupuh Dangdang Gula. Pupuh Dangdang Gula pinika kaiket antuk aturan (pada lingsa) makadi akeh baris ring tiap baitne (pada) inggih punika 12 besik. Sampun kenten akehne suku kata ring tiap-tiap baris (carik) lan suaran untat tiap-tiap baris inggih punika, 11i 4a 6a 8i/8e 8u 8i 8a 8u 8a 4a 8i 4a.

Ring sor punika wantan imba utawi conto "kutipan" Pupuh Dangdang Gula sane ngawangun Geguritan Sampik Ingtai. Cerita sane kaangkat inggih punika rikala I Babah Sampik nyihnayang tresnane ring Ni Nyonyah Ingtai sakewanten nenten kadagingin olih Ni Nyonyah tur digelis ngarauhang utusan mangda gelis Ni Nyonyah mantuk ka Waciu Negari. Minab wenten sameton sane durung tatas uning ring cerita Sampik Ingtai, dados malih ngawacen ring artikel Satua Bali : Sampik Ingtai puniki.

1. Saksat ratu nuduk pitik bengil (11i)
   Mami lara (4a)
   Nyapat pitra ksasar (6a)
   Gela-gela ring kawahe (8e)
   Urip titiang sampun lampus (8u)
   Keto upaminya adi (8i)
   Manyadia mamarekan (8a)
   Ni Nyonyah raris masaur (8u)
   Minab tan wenten utang tiang (8a)
   Memarekan (4a)
   Ring beline kadi mangkin (8i)
   Sarat tuduhing batara (8a)
2. Titiang takut kena munyi manis
   Ngaku tresna
   Gampang nagih nadtad
   Anak eluh uli dini
   Bantangin ban slaka siu
   Joh para bakatang beli
   Saling ke aji kemikan
   Makemulan galir bungut
   Dija pacang saup jemak
   Tuyuh ngucap
   Ngadenan suba manengil
   Pang da nundun dakin basang
3. Mesok gedenan bikas beline dini
   Ngodag-odag
   Marasa teken awak
   Suba ririh di gumine
   Pepes menang bane buruh
   Nasi matahan kadung lekin
   Bibih galir crewet pisan
   Tuara nyandang kapigugu
   Lawar gerang eda nyagerang
   Dasar meka
   To beli jani rasanin
   Damar langit meh bulanan
4. Durung puput marerasan sang kalih
   Laut teka
   Madan I Congliwat
   Utusan mapag Ingtai
   Mangda gelis Nyonyah mantuk
   Dening wenten raos pingit
   Ni Nyonyah misadyayang
   Pacang gelis mantuk
   Kapiragi ya Ni Nyonyah
   Gelisahan
   Irika raris I Sampik
   Kroda idepnya kalintang

Artikel Terkait Ring Kategori