Pupuh Sinom : Prabu Senapati Salya

Pupuh sinom wantah silih sinunggil Kasusastran Bali Purwa sane ngeranjing ring kategori Tembang Macapat utawi Sekar Alit. Pupuh Sinom kaiket antuk aturan pada lingsane (baris tiap baitnya)akehne adasa lan susunan carik lan suaran untatne inggih punika, 8a 8i 8a 8i 8i 8u 8a 8i 4u 8a. Unteng raose biasane anggen maseneng-seneng , liang, pitutur becik utawi nasehat, lan piteket-piteket.

Ring sor puniki wantah marupa imba utawi conto Pupuh Sinom sane ngawangun punggelan carita Prabu Senapati Salya.

1. Iseng-isengan manyurat (8i)
   Nanging sekare ka Widhi (8a)
   Mangapus Bharatayudha (8a)
   Ninggarang mamunyi Bali (8i)
   Sinampura Dewa Gusti (8i)
   Antuk Ida dane ipun (8u)
   Mamunggelang punang crita (8a)
   Duk Sang Salya Senapati ((8i)
   Sampun puput (4u)
   Kabiseka jaya-jaya (8a)
2. Ne mangkin kalungang-lungang
   Ortane rauh sujati
   Kaatur ring Sang Pandawa
   Keweh pangeraas mangkin
   Mawinang maminehin
   Sang Kresna nyanggra masaur
   Ngawijilang pangupaya
   Patut pamargine nyilib
   Tur kadauh
   Yogia Ida Sang Nakula.
3. Mangkin Ida Sang Nakula
   Angob mireng manyingakin
   Tetingkahane ring jumah
   Waluya ring Madrapati
   Bancingahe mancak saji
   Tiing macerancang alus
   Ngojog ka pasarenan
   Sang Salya sedek katangkil
   Eluh-eluh
   Kundang-kundang seseliran.
4. Kagiat kayune manyingak
   Sang Nakula rauh tangkil
   Ngandika Ida manyapa
   "Duh mas mirah uwane cai!
   Lasia cai teka mai
   Buka tong ada mangrungu
   Musuh yatna maglagaran
   Ngrencana yudane mani."
   Raris matur
   Sang Nakula saha sembah.

Inggih amunika kidik antuk tiang ngicenin indik conto Pupuh Sinom. Benjangan malih yen wenten galah, malih tambahin tiang conto-conto Pupuh Sinom sane seosan. Dumogi mawiguna!(*bb/pph)

Artikel Terkait Ring Kategori